Yunit 2
Pakikipamuhay sa Pakikiisa

Aralin 13
Pagkakaisa Tungo sa Kapayapaan

Pahina 145–158; Tatlong araw
MGA LAYUNIN NG LEKSIYON AT KATUMBAS NA K–​12 KOMPETENSI
Layunin
​K–12 Kompetensi
  • Nasasagot ang mga tanong tungkol sa napakinggang kuwento o alamat                              
    • Natutukoy ang mga salita batay sa pagkakagamit ng mga ito sa pangungusap, sa pagkakarinig, o sa pagkakabasa
    • Nasasagot ang mga tanong na ano, sino, saan, kalian, at paano tungkol sa binasa
    • Nakasasagot sa mga simpleng tanong tungkol sa tekstong  binasa
    • Nakapaglalarawan ng mga bagay, tao, pangyayari, at lugar
    • Nasisipi nang wasto at malinaw ang parirala o pangungusap
    • Nagagamit ang phonetic awareness at letter knowledge upang makapagbaybay ng mga salita
  • Nakasusulat sa kabit-kabit na paraan na may tamang laki at layo sa isa’t isa ang mga salita
  • Nakasusulat ng talata sa paglalarawan ng mahalagang tao sa loob ng paaralan
  • F2PN-IIc-3.1.1





  • F2WG-11c-1.4
  • F2RM-11b-f-1.2
​
  • F2PU-Iic-3.2
     
     
     
     
MGA ESENSIYAL NA KATANUNGAN

  • Ano-ano ang mga mahalagang bagay na pagkakakilanlan ng ating bansa?
  • Paano ninyo iginagalang ang ating watawat?
TEKNOLOHIYA AT MGA SANGGUNIAN
  • aklat na Wikang Sarili 2
MGA KAGAMITAN
  • video ng mga estudyanteng hindi iginagalang ang watawat
  • video player/computer
  • larawan ng mga tao at bagay sa paligid  
PAMAMARAAN
Unang Araw
Pagganyak
  1. Ipanood sa mga mag-aaral ang video na nagpapakita ng isang estudyante na hindi iginagalang ang watawat ng Pilipinas.
    Talakayin kung bakit hindi ito dapat gawin ng isang mag-aaral.
  2. Ipakilala sa mga mag-aaral ang United Nations. Sabihin din sa kanila ang tungkol sa pagdiriwang na ginagawa kaugnay nito tuwing buwan ng Oktubre.
  3. Ipabasa sa isang mag-aaral ang talata sa Basahin sa pahina 145. Ipabasa rin ang pamagat ng kuwentong pakikinggan nila.
  4. Itanong sa mga mag-aaral kung ano, sa palagay nila, ang tema ng kuwento batay sa pamagat nito.
  5. Bago basahin ang kuwento, pasagutan ang gawain sa Palawakin sa mga pahina 149 hanggang 152. Iwasto ang kanilang mga sagot.
  6. Ipaalala sa mga mag-aaral ang mga dapat tandaan habang nakikinig ng kuwento.
Paglinang 
  1. Basahin sa klase ang kuwentong “Ang Kasaysayan ng Samahan ng mga Nagkakaisang Bansa” sa mga pahina 145 hanggang 149. Gumamit ng estratehiya na makapupukaw sa interes ng mga mag-aaral para makinig.
  2. Hikayatin din ang mga mag-aaral na tahimik na sumabay sa pagbabasa ng kuwento.
  3. Pagkatapos ng pagbasa, itanong sa mga mag-aaral kung tama ang naisip nilang tema ng kuwento batay sa pamagat nito.
  4. Ipasagot sa mga mag-aaral ang mga tanong sa Talakayin sa mga pahina 152 at 153. Bigyang-diin ang aral na makukuha nila mula sa kuwento.
Paglalagom
  1. Hatiin ang klase para sa pangkatang gawain. Ibigay ang sumusunod na panuto sa mga pangkat.
    a. Unang pangkat - Isulat ang buod ng kuwento.
    b. Ikalawang pangkat – Ilarawan ang pinangyarihan ng kuwento.
    c. Ikatlong pangkat – Isa-isahin ang mga tauhan sa kuwento.
    d. Ikaapat na pangkat – Magkuwento ng isang karanasan na may kaugnayan sa kuwentong binasa.
  2. Hayaang isalaysay ng bawat pangkat sa harap ng klase ang kanilang gawa. Magbigay ng komento tungkol sa mga ginawa ng mga mag-aaral.
  3. Ibigay bilang takdang-gawain ang pagtukoy sa pangunahing ideya ng talata sa bilang 1 sa Gamitin sa pahina 158.
Ikalawang Araw
Panimulang Gawain
  1. Ipabasa sa mga mag-aaral ang kanilang sagot sa takdang-gawain.
  2. Itanong sa kanila kung ano ang kanilang naging batayan sa pagtukoy ng pangunahing ideya sa binasang talata.
Pag-uugnay
  1. Talakayin ang nakasaad sa Palalimin sa pahina 153.
  2. Ipaliwanag sa mga mag-aaral kung ano ang pangunahing ideya. Bigyang-diin na ang pangunahing ideya ay tumutukoy sa pagkilala kung ano ang mahalaga. Nagsasaad din ito ng tema at aral na makukuha sa isang kuwento, sanaysay, o seleksiyon.
  3. Ipabasa ang mga talata sa pahina 154 at ipatukoy sa mga mag-aaral ang pangunahing ideya ng mga ito. Ipatukoy din ang pangunahing ideya ng talata sa bilang 2 sa Gamitin sa pahina 158.
  4. Maaaring magbigay pa ng ibang seleksiyon, gaya ng kuwento, awit, at tula, upang lalong malinang ang kakayahan ng mga mag-aaral sa pagtukoy ng pangunahing ideya.
Paglalagom 
  1. Ipaliwanag sa mga mag-aaral ang kahalagahan ng kasanayan sa  pagtukoy ng pangunahing ideya ng mga seleksiyon na kanilang binabasa.
  2. Bilang takdang-gawain, sabihin sa mga mag-aaral na balikan ang kuwentong “Ang Kasaysayan ng Samahan ng mga Nagkakaisang Bansa” at isulat sa notebook ang pangunahing ideya ng kuwento.
Ikatlong Araw
Pagbabalik-aral
  1. ​Iwasto ang takdang-gawain. Pumili ng mga mag-aaral na magbabasa ng kanilang gawa sa harap ng klase.
  2. Isagawa ang gawain sa Pagsulat at Pagbaybay sa pahina 158. Magdikta sa mga mag-aaral ng mga salitang ginamit sa nakaraang aralin.
  3. Gabayan ang mga mag-aaral sa gagawing pagsusulat. Tiyaking wasto ang kanilang pagkakasulat ng mga salita.
B. Pag-uugnay
  1. ​Ipakita sa mga mag-aaral ang mga inihandang larawan ng mga tao o bagay sa paligid.
  2. Hikayatin ang mga mag-aaral na gumawa ng mga pangungusap batay sa nakikita sa mga larawan. Sikaping makagawa sila ng mga pangungusap gamit ang mga salitang si, sina, ang, at ang mga. 
  3. Ipabasa sa mga mag-aaral ang bawat pangungusap sa Alamin sa mga pahina 154 at 155.
  4. Pagkatapos basahin ang unang pangungusap, talakayin ang sagot sa mga tanong na kasunod nito. Ganito rin ang gawin sa mga susunod pang pangungusap.
  5. Talakayin ang wastong paggamit ng mga pantukoy na si at sina, ang at ang mga.
  6. Pasagutan sa mga mag-aaral ang mga gawain sa Kaya Mo Ito at Gawin Mo sa mga pahina 156 at 157.
  7. ​Sabihin ang mga tamang sagot. Ipaliwanag kung bakit iyon ang mga wastong sagot sa pagsasanay upang higit na maunawaan ng mga mag-aaral ang tamang gamit ng mga pantukoy na tinalakay.
Paglalagom
  1. ​Muling itanong sa mga mag-aaral kung paano gamitin ang si, sina, ang, at ang mga sa pangungusap.
  2. Gabayan ang pagsagot ng mga mag-aaral upang masabi nila ang nakasaad sa Tandaan sa pahina 155 bilang paglalagom sa aralin.
  3. Ibigay bilang takdang-aralin ang gawain sa Magsanay Pa sa pahina 157.